राजकारणात अशक्य काहीच नाही.समाजहितासाठी चांगल्या प्रगल्भ विचारधारेची माणसं एकत्र आली तर नक्कीच समाजाचा विकास होऊ शकतो. असाच प्रयोग महाविकास आघाडीचा घटक पक्ष असलेला काँग्रेस व महायुतीचा घटक पक्ष असलेला शिवसेना एकत्रित येत उमरगा नगरपरिषद निवडणुकांसाठी नवीन स्थानिक विकास आघाडी तयार केली आहे.
यामुळे उमरगा मध्ये नवीन राजकीय समीकरणे उदयास येणार असून शिवसेना काँग्रेस स्थानिक आघाडीचे नगराध्यक्ष पदाचे उमेदवार किरण गायकवाड यांना याचा फायदा होताना दिसत आहे.
माजी खासदार रविंद्र गायकवाड, माजी आमदार ज्ञानराज चौगुले व काँग्रेस पक्षाचे अमोल मोरे यांच्या नेतृत्वामध्ये ही नवी विकास आघाडी उमरगा नगरपरिषदेच्या स्थानिक स्वराज्य संस्थेच्या निवडणुकांना सामोरी जाणार आहे. यामध्ये शिवसेनेला नगराध्यक्ष पद व 13 जागा तर काँग्रेसला 11 जागा देण्यात आल्या आहेत.
शिवसेनेसोबत काँग्रेस पक्ष आल्यामुळे उमरगा मधील स्थानिक पातळीवर किरण गायकवाड यांची विजयाची दावेद्वारे प्रबळ मानली जात आहे. त्यांच्यासमोर भाजपाचे हर्षवर्धन चालुक्य यांचे आवाहन असणार असून त्यांच्यासोबत राष्ट्रवादी काँग्रेस पार्टी अजित पवार गट असणार आहे. शिवसेना उद्धव बाळासाहेब ठाकरे पक्षाचे रजाक अत्तार हे महाविकास आघाडी चे घटक पक्ष असलेले राष्ट्रवादी काँग्रेस पार्टी शरद पवार गट व मनसे यांना सोबत घेऊन रिंगणात उतरले आहेत.
माघार घेण्याची तारीख संपल्यानंतर आता उमेदवारांचे समोरासमोर प्रचार सुरू होणार असून प्रचार रिंगणात आरोप प्रत्यारोपांच्या फायरी झाडताना पाहायला मिळतील. यामुळे तिरंगी झालेली ही लढत अधिकच चुरशीची मानली जात आहे.
